प्रधानमन्त्री बालेन्द्र शाह ‘बालेन’सँग सम्बन्धित १२ वर्ष पुरानो एक र्‍याप भिडिओविरुद्ध साइबर ब्युरोमा उजुरी दर्ता भएको छ। उक्त भिडिओ युट्युबबाट हटाउन माग गर्दै शुक्रबार संयुक्त रूपमा उजुरी दिइएको हो।

विवेक मगर, रोजी पुन, महिन्द्रसिँह दनुवार र पवन राई (बाबु)ले दायर गरेको उजुरीमा ‘रअ बार्ज’ अन्तर्गतको र्‍याप ब्याटलमा प्रयोग भएका शब्दहरू महिला तथा यौनिक अल्पसङ्ख्यक समुदायविरुद्ध घृणास्पद र अपमानजनक रहेको उल्लेख गरिएको छ।

उजुरीमा सङ्ग्स नेपाल युट्युब च्यानलमा अपलोड गरिएको करिब २० मिनेट लामो भिडिओको लिंकसमेत समावेश गरिएको छ। सो भिडिओमा प्रयोग गरिएका केही शब्द र अभिव्यक्तिले महिला तथा लैङ्गिक अल्पसङ्ख्यक समुदायलाई होच्याउने, यौन हिंसालाई सामान्यीकरण गर्ने र अमानवीय सन्देश दिने काम गरेको आरोप लगाइएको छ।

उजुरीकर्ताहरूले हाल प्रधानमन्त्रीजस्तो उच्च सार्वजनिक पदमा रहेका व्यक्तिसँग जोडिएको यस्तो सामग्रीले सामाजिक वातावरणमा नकारात्मक प्रभाव पार्ने दाबी गरेका छन्। उनीहरूका अनुसार उक्त अभिव्यक्तिहरूले संविधानले सुनिश्चित गरेको सम्मानपूर्वक बाँच्न पाउने र समानताको हकमा समेत असर पुर्‍याएको छ।

यस्तै, विद्युतीय कारोबार ऐन, २०६३ अन्तर्गत सार्वजनिक मर्यादा र सामाजिक सद्भावविरुद्ध हुने खालका सामग्री भएकाले उक्त भिडिओ गैरकानुनी रहेको दाबी पनि गरिएको छ।

उजुरीमा उक्त सामग्री साइबर अपराधअन्तर्गत पर्ने भन्दै आवश्यक अनुसन्धान गरी कानुनी कारबाही गर्न माग गरिएको छ। साथै, भिडिओ हटाउने, सार्वजनिक रूपमा माफी माग्ने र क्षतिपूर्ति दिलाउनुपर्ने मागसमेत अघि सारिएको छ।

भिडिओको भ्युज १ करोड ५० लाख पुगेको उल्लेख गर्दै त्यसबाट भएको आम्दानीलाई लैङ्गिक अल्पसङ्ख्यक समुदायको सकारात्मक सन्देश फैलाउने काममा प्रयोग गर्नुपर्ने माग पनि गरिएको छ।